काठमाडौँ ।
सुदूरपश्चिम प्रदेशका कामु प्रमुख सचिव (सहसचिव) वैकुण्ठप्रसाद अर्यालको नाम सचिव बढुवाका लागि सिफारिस गरिएको छ । लोकसेवा आयोगका अध्यक्ष माधवप्रसाद रेग्मीको अध्यक्षतामा बसेको सचिव बढुवा सिफारिस समितिले प्रशासन सेवातर्फ रिक्त सचिव पदमा ज्येष्ठताका आधारमा अर्याललाई बढुवा गर्ने निर्णय गरेको हो ।
राष्ट्रिय योजना आयोगमा कार्यरत सचिव गोकर्णमणि दुवाडी मंसिर ९ गते रातिदेखि सचिव पदको पाँच वर्षे कार्यावधि पूरा गरी अनिवार्य अवकाशमा गएपछि प्रशासन सेवामा एउटा सचिव पद खाली भएको थियो । सो रिक्त पदका लागि ज्येष्ठताका आधारमा सहसचिव अर्यालको नाम सिफारिस गरिएको संघीय मामिला तथा सामान्य प्रशासन मन्त्रालयको बढुवा शाखाले जनाएको छ ।
सचिव बढुवा सिफारिस समितिमा सामान्य प्रशासन सचिव सदस्य–सचिवका रूपमा रहने व्यवस्था छ । समितिको निर्णय सामान्य प्रशासन मन्त्रालयमार्फत मन्त्रिपरिषद्मा प्रस्ताव लैजाने प्रावधान छ ।
निजामती सेवा ऐनअनुसार कार्यसम्पादन मूल्याङ्कनका आधारमा हुने बढुवामा लगातार चार पटकसम्म एक सचिवका लागि तीन वरिष्ठ सहसचिवको नाम सिफारिस गरिन्छ । पाँचौँ पटक भने ज्येष्ठताका आधारमा एकमात्र वरिष्ठ सहसचिवको नाम सिफारिस गरिने व्यवस्था छ ।
अर्याल ज्येष्ठ सहसचिव भएकाले यसपटक एकल सिफारिस बन्न पुगेको मन्त्रालयले जनाएको छ । स्रोतका अनुसार सोमबार बस्ने मन्त्रिपरिषद् बैठकबाट अर्याललाई सचिवमा बढुवा गर्ने तयारी छ ।
