काठमाडौँ ।
नेपाल राष्ट्र बैंकले १ सय रुपैयाँ दरको नयाँ बैंक नोट प्रचलनमा ल्याएको छ । बैंकले एक सूचना जारी गर्दै आजदेखि विशेष सुरक्षा सुविधासहितको नयाँ नोट चलनचल्तीमा आएको जानकारी दिएको हो ।
साबिककै आकार र रङमा आउने नयाँ नोटमा ‘नेपाल सरकारको जमानत प्राप्त, यसको रुपैयाँ भुक्तानी माग्न आएमा नेपाल राष्ट्र बैंकबाट १०० रुपैयाँ तुरुन्त पाइने छ’ भन्ने प्रतिज्ञामूलक वाक्यांश उल्लेख गरिएको छ ।
नोटको बायाँतर्फ सगरमाथाको चित्र र दायाँतर्फ लालीगुराँसको पानी छाप राखिएको छ । मध्य भागमा नेपालकाे नक्सा र अशोक स्तम्भको चित्र समावेश गरिएको छ ।
दृष्टिविहीनहरूले छामेर नोट पहिचान गर्न सक्ने गरी अशोक स्तम्भसँगै एउटा कालो थोप्ला राखिएको छ । त्यस्तै, बायाँतर्फ अण्डाकार भित्र सिल्भर मेटालिकमा मायादेवीको चित्र रहेको छ । सुरक्षाका लागि नोटमा २ मिमि चौडाइको सुरक्षा धागो राखिएको छ, जसलाई सीधा हेर्दा रातो र ढल्काएर हेर्दा हरियो देखिन्छ ।
नोटमा तत्कालीन गभर्नर महाप्रसाद अधिकारीको दस्तखत रहेको छ । तल्लो भागको बर्डरमा नोटको सिरिज ‘वि.सं. २०८१’ नेपाली अंकमा मुद्रित गरिएको छ ।
