काठमाडौं, १४ मंसिर ।
नेपाल विज्ञान तथा प्रविधि प्रज्ञा प्रतिष्ठान (नास्ट)ले शिक्षकहरूको क्षमतालाई अभिवृद्धि गर्ने उद्देश्यसहित तालिम प्रदान गर्न सुरु गरेको छ ।
पठनपाठनमा एआईजस्ता नवीनतम प्रविधि प्रयोग गरेर विद्यार्थीहरूलाई गुणस्तरीय शिक्षा दिन सहयोग गर्ने उद्देश्यसहित नास्टको विज्ञान तथा प्रविधि सूचना प्रणाली केन्द्र अन्तर्गत रहेको सूचना पहुँच केन्द्रले तालिम सुरु गरेको हो ।
हालसम्म नास्टले काठमाडौँको चन्द्रागिरी नगरपालिकाका सामुदायिक विद्यालयमा अध्यापनरत २३ जना विज्ञान शिक्षक र टोखा नगरपालिकाका १९ जना विज्ञान शिक्षकलाई तालिम दिइसकेको सूचना प्रणाली केन्द्रका कोअर्डिनेटर प्रदीप ढोडारीले बताए ।
उनका अनुसार यो तालिम पूर्ण दिनको हुन्छ । अहिलेसम्म परीक्षणका रूपमा सञ्चालन गरिएको यो तालिममा शिक्षकहरूले च्याटजीपीटी, जेमिनाई, डिपसिक जस्ता एआई टुल्स प्रयोग गरी शैक्षिक सामग्री निर्माण गर्ने, परियोजना प्रतिवेदन बनाउने, नमुना प्रश्नपत्र तयार पार्ने जस्ता सीपहरू सिक्नेछन् । यसले शिक्षकहरूलाई पछिल्ला प्रविधिसँग नजिक बनाउने पनि ढोडारीले बताए ।
उनले भने, “आधुनिक विद्यालय शिक्षामा एआईका विभिन्न टुल्स कसरी प्रयोग गर्ने, आजको सूचना प्रविधिको विकाससँगै हाम्रो कक्षागत सिकाइलाई कसरी अझ प्रभावकारी बनाउने, र सिकाइलाई जीवनोपयोगी बनाउने भन्ने सन्दर्भमा तालिम केन्द्रित छ ।”
यो तालिम क्रमशः अन्य नगरपालिकामा पनि विस्तार गर्ने योजना छ । भविष्यमा तालिमको निश्चित ढाँचा बनाएर सकेसम्म देशभर विस्तार गर्ने तयारी भइरहेको उनले बताए ।
हाल यो तालिममा श्रोत व्यक्तिका रूपमा माध्यमिक तहका कम्प्युटर विज्ञान पुस्तकका लेखक सुनिल घर्ती, राहुल महथा र अनुप पौड्याल रहेका छन् ।
